Konsullata e Republikës së Kosovës në Dusseldorf të Gjermanisë ka organizuar ngjarje solemne me rastin e Ditës së Çlirimit të Kosovës.
Konsulli i Përgjithshëm në detyrë në Dusselrdof, Behar Isma tha se Kosova është shndërruar në një shembull frymëzues në rajon e vend që ndërton të ardhmen mbi themele të demokracisë dhe sundimit të ligjit.
“Më 12 qershor 1999, u mbyll një kapitull i dhimbshëm dhe i errët i historisë sonë dhe nisi një epokë e re – ajo e lirisë, shpresës dhe rindërtimit. Sot, Kosova është një shtet i lirë, sovran dhe demokratik – një vend që synon integrimin e plotë në strukturat euroatlantike dhe që është thellësisht i përkushtuar në forcimin e shtetit të së drejtës, zhvillimin e qëndrueshëm ekonomik dhe ndërtimin e marrëdhënieve të mira me fqinjët dhe me gjithë botën demokratike. Republika e Kosovës është shndërruar në një shembull frymëzues në rajon – një vend që ndërton të ardhmen mbi themelet e demokracisë, sundimit të ligjit dhe respektit për të drejtat e njeriut”, theksoi ai.
Tutje Isma shtoi se ne këtë rrugëtim, mbështetja e partnerëve ndërkombëtarë ka qenë vendimtare dhe e pazëvendësueshme.
“Republika Federale e Gjermanisë, vendi mik që na pret sot dhe që ka qenë ndër mbështetësit më të mëdhenj në periudhat më të vështira dhe më vendimtare për Kosovën, ka luajtur një rol kyç në përkrahje të të drejtave tona, të zhvillimit institucional dhe të integrimit ndërkombëtar. Aleatët tanë tjerë ndërkombëtarë që kanë qëndruar pranë Kosovës, që nga koha e ndërhyrjes ushtarake deri në proceset e ndërtimit të paqes, demokratizimit dhe zhvillimit ekonomik”, shtoi Isma.
Në këtë ngjarje mori pjesë edhe Josef Neumann, përfaqësues i parlamentit të NRW.
“Ne kujtojmë numrin e madh të viktimave të luftës, familjarët e tyre dhe pasardhësit e tyre. Kjo ditë na kujton edhe numrin e madh të të dëbuarve nga Kosova që kanë gjetur strehim këtu tek ne. Gjatë kohës sa kam qenë në lëvizje unë kam takuar shumë shqiptarë të Kosovës të cilët janë të angazhuar në mënyrë të ndershme në punët e tyre, dhe mund të them që ata e japin një kontribut të jashtëzakonshëm për vendin tonë”, shtoi ai.
Drejtori i Institutit për Krimet e Kryera gjatë Luftës në Kosovë, Atdhe Hetemi teksa foli për punën e institutit që ai udhëheq, shtoi se e vërteta duhet të jetë themeli mbi të cilin ndërtohet drejtësia.
“Ekspozita dhe tubimi në të cilin jemi pjesë sot mbartin një rëndësi të madhe simbolike dhe qytetare. Ato jo vetëm që evokojnë kujtesën, por edhe thërrasin për reflektim, rrëfim të së vërtetës dhe përgjegjësi. Materialet që po paraqesim, dokumentet origjinale, dëshmitë e të mbijetuarve dhe pamjet arkivore nuk janë thjesht të dhëna historike. Ato janë kujtesë e gjallë. Ato flasin për dhimbjen e përjetuar, dinjitetin e ruajtur dhe qëndrueshmërinë e një shoqërie që refuzoi të dorëzohej edhe përballë krimeve më të rënda”, deklaroi Hetemi.
Në këtë ngjarje morën pjesë edhe veteranë të luftës së Ushtrisë Çlirimtare të Kosovës, si dhe familjarë të dëshmorëve të kombit, e po ashtu edhe ministri në detyrë i Bujqësisë, Faton Peci.
