Shkruan: Dr. Gurakuç KUÇI – Hulumtuesi i Lartë në Institutin për Studime të Luftës Hibride “OCTOPUS”
Gjithnjë e më shumë profile serbe në rrjete sociale po përhapin idenë se, në sfondin e luftës Izrael-Iran dhe Rusi-Ukrainë, “rilidhja” e Kosovës me Serbinë mund të ndodhë pa pasoja ndërkombëtare. Kjo nuk është thjesht retorikë: është STRATCOM i pastër dhe i koordinuar.
Mos harroni deklaratën e Vuçiqit në prill 2024: “Ne po presim ndryshimet gjeopolitike për të reaguar.” Ajo u bë pikërisht kur Kosova po avanconte drejt NATO-s dhe në procesin për anëtarësim në Këshillin e Evropës.
Beogradi nuk është aq naiv sa të besojë se mund ta marrë Kosovën pa luftuar NATO-n. Por po synon një skenar tjetër:
– Të krijojë një kaos të kontrolluar në veri,
– Të nxisë “rezistencë civile” me grupet e instrumentalizuara lokale,
– Dhe më pas ta detyrojë KFOR-in të vendosë kordon sigurie, duke ndarë veriun nga jugu me fakt të kryer.
Kjo është një formë e përparuar e destabilizimit hibrid – jo me tanke, por me rrjete sociale, frikë, dhe inxhinieri të krizës.
Prandaj, vigjilenca e shtetit, mediave dhe shoqërisë civile është kyçe. Nuk duhet të injorojmë asnjë sinjal.
