Zëvendëskryeministrja dhe Ministrja në detyrë e Punëve të Jashtme dhe Diasporës, Donika Gërvalla, ka zhvilluar takime me Ministrin e Punëve të Jashtme të Polonisë, Radosław Sikorski, si dhe me Zëvendëskryeministrin dhe Ministrin e Jashtëm të Maltës, Ian Borg, në margjinat e Ministerialit të mbajtur në Taormina, me rastin e 70-vjetorit të Konferencës së Messinës.
Ministria e Punëve të Jashtme dhe Diasporës ka njoftuar se në këto takime, Gërvalla ka theksuar rëndësinë e mbështetjes së vazhdueshme të aleatëve evropianë në rrugën euroatlantike të Kosovës, duke e konsideruar këtë mbështetje thelbësore në një periudhë sfidash për Evropën dhe botën demokratike.
“Mbështetja e aleatëve si Polonia dhe Malta është thelbësore për rrugëtimin euroatlantik të Kosovës. Në të njëjtën kohë, gatishmëria për të thelluar bashkëpunimin dypalësh dhe për të shtyrë përpara agjendat e përbashkëta mbetet një pikë kyçe e përkushtimit tonë të ndërsjellë,” ka thënë Gërvalla.
Ajo ka theksuar se Kosova do të vazhdojë të japë kontributin e saj si një faktor i qëndrueshëm në rajon dhe si një partner i besueshëm në kuadër të bashkëpunimit dypalësh dhe shumëpalësh për paqen, sigurinë dhe të ardhmen evropiane.
