Sekretari i Përgjithshëm i Kombeve të Bashkuara, Antonio Guterres, reagoi ndaj sulmit të SHBA-së ndaj Iranit, duke deklaruar se ky është një “përshkallëzim i rrezikshëm”.
“Jam thellësisht i shqetësuar nga përdorimi i forcës nga Shtetet e Bashkuara të Amerikës kundër Iranit sot. Ky është një përshkallëzim i rrezikshëm në një rajon që është tashmë në prag të rrënimit – dhe një kërcënim i drejtpërdrejtë për paqen dhe sigurinë ndërkombëtare”, tha ai.
Më pas ai shprehu frikën se situata mund të dilte jashtë kontrollit.
“Ekziston një rrezik në rritje që ky konflikt të dalë shpejt jashtë kontrollit – me pasoja katastrofike për civilët, rajonin dhe botën”, tha ai.
Ai u bëri thirrje shteteve anëtare të OKB-së që të ulin tensionet dhe të përmbushin detyrimet e tyre sipas Kartës së OKB-së dhe rregullave të tjera të së drejtës ndërkombëtare.
“Në këtë moment të rrezikshëm, është thelbësore të shmanget një spirale kaosi. Nuk ka zgjidhje ushtarake. E vetmja rrugë përpara është diplomacia. E vetmja shpresë është paqja”, beson Guterres.
