Një bazë ushtarake amerikane në Siri ishte cak i një sulmi me mortaja, raporton agjencia iraniane e lajmeve Mehr, duke cituar burime të shumta.
Agjencia deklaron se burime të informuara thanë se sulmi u krye në bazën amerikane të vendosur në pjesën perëndimore të provincës siriane Hasakah.
Bëhet fjalë për bazën amerikane Qasrak, e cila ka pistën më të gjatë të ndërtuar nga forcat amerikane në Siri, rreth 1.7 kilometra të gjatë.
“Forcat në gatishmëri”
Pas sulmit, sipas të njëjtave burime, u morën masa të shtuara sigurie në hyrjen kryesore të bazës.
Sipas burimeve të agjencisë arabe të lajmeve Al Maalomah, incidenti ndodhi këtë mëngjes kur ndërtesa u sulmua me një predhë mortaje. Thuhet se aktualisht nuk ka informacion se kush e qëlloi atë ose nga erdhi.
Pretendohet se pas bombardimeve, kontingjenti amerikan i vendosur në bazë u vu në gatishmëri të lartë, disa helikopterë amerikanë u ngritën dhe ushtarët amerikanë kontrolluan zonën përreth objektit.
