Shkruan: Rasim SMAJLAJ
Vota është arma më e fortë e qytetarit në demokraci. Por çfarë ndodh kur ajo armë keqpërdoret, injorohet apo përdoret për interesa të ngushta partiake? Në zgjedhjet e fundit qytetari i Kosovës votoi me shpresë. Por sot, shumë prej nesh ndihen të tradhtuar. Pyetja që po shtrohet me të drejtë është: kush na e dogji votën këtë herë?
- LVV – Premtimet e mëdha, zbatimi i vonuar
Lëvizja Vetëvendosje, si fituese e zgjedhjeve, kishte përgjegjësinë kryesore për të formuar institucionet. Por përkundër fitores, ajo po dështon të krijojë një qeveri funksionale. Konsultimet formale, arroganca ndaj opozitës dhe përdorimi i gjuhës përçarëse po e pengojnë ndërtimin e konsensusit. A e përfaqësoi votën e qytetarit si duhet?
- PDK, LDK, AAK – Opozita që nuk po e di çfarë do
Partitë opozitare, në vend që të jenë alternativa serioze, janë bërë pjesë e lojërave të numrave, bllokimeve dhe llogarive për interesa partiake. Herë dalin me deklarata, herë heshtin, por gjithmonë janë në pritje që “të përfitojnë” nga situata. A janë këto parti zëri i qytetarit apo i kalkulimeve politike?
- Populli i anashkaluar
Kuvendi i Kosovës është kthyer në një skenë bosh pa kryetar e pa qeveri funksionale. Institucionet janë në ngërç, ndërsa qytetari pret me shpresë që vota e tij të mos jetë djegur më kot. Prej 58% që votuan, shumica ndihen të papërfaqësuar.
Sot, më shumë se kurrë, duhet të themi me zë të lartë: vota nuk është pronë e partive politike. Ajo është kontratë që populli ua jep për t’i përfaqësuar me nder dhe përgjegjësi. E nëse e dogjën këtë votë – qofshin nga pushteti apo opozita – do të duhet ta paguajnë në zgjedhjet e ardhshme sepse qytetari nuk harron.
