Kryetari i Prishtinës, Përparim Rama, ka pritur në Odën e Kryeqytetit të dërguarin special për Ballkanin Perëndimor nga Mbretëria e Norvegjisë, z. Erik Nestas Mathiesen. Gjatë takimit, Rama shprehu mirënjohjen e thellë për mbështetjen e vazhdueshme që Norvegjia ka dhënë për ndërtimin dhe forcimin e shtetit të Kosovës.
Në shenjë falënderimi, Rama i dhuroi z. Mathiesen një kopje të “Hyjneshës në Fron”, një nga simbolet më të çmuara të trashëgimisë kulturore të vendit duke e cilësuar këtë dhuratë si simbol të mirënjohjes së thellë për përkrahjen e popullit dhe shtetit norvegjez ndër vite.
“Mirënjohja ndaj partnerëve tanë nuk është vetëm detyrim institucional, por një vlerë thelbësore që duhet ta ruajmë e ta kultivojmë në çdo hap të rrugës sonë”, tha Rama.
Ai theksoi gjithashtu se Prishtina mbetet gjithmonë e hapur për dialog, ide dhe bashkëpunime që kontribuojnë në zhvillim të qëndrueshëm dhe stabilitet afatgjatë.
Kryetari i Prishtinës përfundoi mesazhin e tij me një falënderim të veçantë për Erik Mathiesen dhe Mbretërinë Norvegjeze për partneritetin e qëndrueshëm dhe miqësor ndaj Kosovës. /Kosovatimes/
