Kryetari i Partisë Demokratike të Kosovës, Memli Krasniqi ka takuar shefin e ri të misionit të OSBE-së në Kosovë, Gerard McGurk.
Ai ka treguar se me diplomatin britanik diskutuan për zhvillimet politike e shoqërore në vend.
“E mirëprita në fillimin e misionit të tij në Kosovë dhe biseduam për zhvillimet aktuale politike dhe shoqërore në vend. Vlerësova angazhimin e OSBE-së në forcimin e institucioneve demokratike dhe sundimit të ligjit”, shkroi Krasniqi pas takimit.
Ambasadori Gerard McGurk, diplomat karriere në Shërbimin Diplomatik Britanik, i emëruar si shef i OSBE-së në Kosovë sipas përshkrimit që i ka bërë organizata në Prishtinë, ka përvoja diplomatike që përfshinë angazhim të gjerë në menaxhim të krizave, marrëdhënie ndërkombëtare bilaterale dhe multilaterale në rajone të ndryshme, nga Madridi, Amani, në Shkup e Kombe të Bashkuara në Nju Jork.
Ambasadori McGurk ka qenë pjesë e Ekipit të Qeverisë Britanike për Statusin Final në kuadër të punës së të Dërguarit të Posaçëm të OKB-së, Martti Ahtisaari në vitet 2005-2007.
