Me një tjetër reagim, të dytin me radhë sot, ka dalë në orët e pasdites Ministria e Arsimit, Shkencës, Teknologjisë e Inovacionit pas zhvillimeve të fundit në Institutin Albanologjik.
Sipas MASHTI-t më 20 qershor janë raportuar veprime të njëanshme dhe në kundërshtim me rregulloren e brendshme, aty ku Këshilli Drejtues i Institutit Albanologjik ka emëruar ushtruesin e detyrës së drejtorit të këtij institucioni.
“Në përputhje me Rregulloren e Punës së Këshillit Drejtues të Institutit Albanologjik, vendimmarrja e këtij organi kërkon kuorum prej katër anëtarësh, nga gjithsej pesë sa ka Këshilli. Në mbledhjen e datës 20 qershor, ishin të pranishëm vetëm tre anëtarë, prandaj çdo vendim i marrë është juridikisht i pavlefshëm dhe në kundërshtim me rregulloren në fuqi”, thotë MASHTI, që ka paralajmëruar se rasti do të trajtohet përmes Zyrës Ligjore.
Sipas tyre, institucione me rëndësi të veçantë kombëtare si Instituti Albanologjik nuk mund të shndërrohen në platforma për emërime të paligjshme apo përpjekje për shfrytëzim të pozitave për interesa personale apo politike.
“Integriteti i tij shkencor dhe ligjor është në funksion të avancimit të kërkimit, ruajtjes së trashëgimisë kombëtare dhe respektimit të standardeve akademike. MAShTI, përmes anëtarëve të deleguar në Këshillin Drejtues, ka kërkuar vazhdimisht që të shpallet konkursi për drejtor të rregullt, por ky proces është zvarritur për më shumë se një vit, dhe deri më sot, konkursi ende nuk është shpallur. Ministria e konsideron këtë vonesë të pajustifikueshme dhe, përmes Zyrës së saj Ligjore, do ta trajtojë këtë çështje, duke ndërmarrë të gjitha veprimet e nevojshme për kthimin e ligjshmërisë dhe zbatimin e ligjit në përpikëri”, thuhet tutje në sqarimin e MASHTI-t për këtë çështje.
Ata kanë ftuar kolegët, anëtarët e komunitetit akademik dhe publikun të qëndrojnë bashkë në ruajtjen e vlerave që, sipas MASHTI-t, e mbajnë të shëndetshme dhe funksionale jetën akademike e institucionale në vend.
Ky ishte reagimi i dytë gjatë ditës së sotme nga Ministria e Arsimit Shkencës, Teknologjisë e Inovacionit.
Gjatë paradites kjo ministri kishte reaguar duke thënë se dje, më 23 qershor, pa pasur një njoftim paraprak, përmes e-mailit zyrtar kishin pranuar njoftimin nga Instituti Albanologjik se më datë 20.06.2025 është mbajtur mbledhja e Këshillit Drejtues, ku përveç pikave të tjera, është vendosur për caktimin e u.d. drejtorit të Institutit Albanologjik të Prishtinës (IAP), duke thënë se do të shqyrtojnë këtë vendimmarrje në pajtim me kompetencat dhe mandatin ligjor.
Më 20 qershor Instituti Albanologjik kishte njoftuar se Meliza Krasniqi ishte emëruar ushtruese e detyrës së drejtoreshës së këtij instituti, pas propozimit të Këshillit Shkencorë.
Ndërkohë, nesër nga ora 13:00 Instituti Albanologjik ka njoftuar se do të mbajnë konferencë për media për siç kanë thënë ata “me qëllim të sqarimit publik dhe institucional lidhur me caktimin e ushtruesit të detyrës së drejtorit të Institutit, si dhe për të reaguar ndaj deklaratave të dhëna nga Ministria e Arsimit, Shkencës, Teknologjisë dhe Inovacionit (MAShTI)”.
Nga Instituti kanë thënë se gjatë kësaj konference nesër do të paraqiten faktet, bazën ligjore dhe procedurat e ndjekura nga Këshilli Drejtues, duke sqaruar në mënyrë të qartë, sipas tyre, legjitimitetin e veprimeve të ndërmarra dhe duke adresuar paqartësitë e krijuara në opinionin publik.
“Po ashtu, do të shpalosen disa prej çështjeve thelbësore dhe mangësive që e vështirësojnë funksionimin normal të Institutit, si dhe do të prezantohen fakte të reja lidhur me qasjen e padrejtë, të pashpjegueshme dhe joparimore që MAShTI po ndjek ndaj Institutit tash e një kohë të gjatë”, thuhet në njoftimin e Institutit Albanologjik për konferencën e së mërkurës.
Meliza Krasniqi, e emëruar si ushtruese e detyrës së drejtoreshës së Institutit Albanologjik në Prishtinë është bashkëshortja e kryetarit të PDK-së, Memli Krasniqi.
