Bashkëkryetarja e partisë Guxo, që është në koalicion me Vetëvendosjen, deputetja e ministrja në detyrë e Punëve të Jashtme, Donika Gërvalla ka thënë se ajo çfarë dje nuk ka dhënë përgjigje Gjykata Kushtetuese është se çfarë ndodhë pas 30 ditësh.
“Pyetja të cilën dje Gjykata Kushtetuese nuk ka dhënë përgjigje, është se çfarë ndodhë pas 30 ditësh e unë besoj shumë që nuk do të sfidohemi përsëri që pas 30 ditësh të kemi nevojë për zgjidhje kreative, por shumë besoj që pas takimit të nesërm me kryeministrin Kurti, liderët edhe të opozitës do të arrijnë një dakordim”, tha ajo.
Gërvalla, tha se opozitarët vetë e dërguan kërkesën për interpretim e vetë nuk po e pranojnë.
“Kjo sjellja e opozitës pas atij vendimi të djeshëm, mua ma çon mallin te një lojtari të keq të shahut, i cili në momentin që e sheh që e ka humbur lojën i rrëzon figurat e shahut. Vetë e kanë dërguar kërkesën në Kushtetuese, vetë nuk po e pranojnë vendimin dhe vetë e kanë refuzuar, e tash arsyetohen me rregullore e ç’rregullore. Asnjë pikë e rendit të ditës nuk është ndryshuar. Pika e rendit të ditës është zgjedhja e kryetarit, kryetares së Kuvendit”, tha ajo.
