Ministri i Punëve të Brendshme, Xhelal Sveçla, i shoqëruar nga ministri i Pushtetit Lokal, Elbert Krasniqi, zëvendësdrejtori i Përgjegjshëm i Policisë së Kosovës, Fehmi Hoti, kryetari i Komunës së Zubin Potokut, Izmir Zeqiri, si dhe zëvendësdrejtori i Policisë së Kosovës për rajonin e Mitrovicës, Veton Elshani, vunë gurthemelin e stacionit të ri të Policisë së Kosovës në Zubin Potok.
Sveçla me këtë rast, theksoi se ky stacion modern do të ofrojë kushte komode për pjesëtarët e Policisë së Kosovës, do të ofrojë siguri edhe më të madhe, si dhe do të jetë adresë e raportimit për të gjithë qytetarët pa dallim.
Ministri Sveçla vuri në dukje se për të ofruar siguri më të lartë, duhet t’i shtohet edhe infrastruktura përcjellëse moderne.
“Ky stacion modern do të jetë infrastrukturë e nevojshme për pjesëtarët e Policisë sonë dhe burim i sigurisë e adresë e raportimit për të gjithë qytetarët pa dallim. Sigurisë më të lartë po ia shtojmë edhe infrastrukturën më të mirë”, ka thënë Sveçla.
Ai tutje ka theksuar se mbeten të përkushtuar në ruajtjen e sigurisë së qytetarëve, qetësisë publike dhe sovranitetit e integritetit territorial të vendit tonë.
