Oda Ekonomike e Kosovës njofton për aktvendimin e radhës, i cili ka ardhur nga Gjykata Komerciale në Prishtinë, përmes padisë së ushtruar nga bashkëpunëtorët e OEK Shoqëria e Avokatëve “Sejdiu & Qerkini”, që pezullon vendimin e ZRRE-së për daljen në treg të lirë të energjisë për një anëtar të Odës.
Përmes një komunikate për medie OEK bën të ditur se ky aktvendim nga Gjykata duhet të shërbejë si argument i fortë për ZRRE-në që të rishqyrtojë tërësisht dhe të pezullojë vendimin për të gjitha bizneset, për të parandaluar dëmtimin e konkurrencës së lirë, biznesit, qytetarëve dhe ekonomisë së Kosovës
“Për këtë arsye, Oda Ekonomike e Kosovës i bën thirrje ZRRE-së që pa emocione, në mënyrë profesionale dhe transparente, të shfuqizojë vendimin për daljen e bizneseve në mënyrë të dhunshme në tregun e lirë të energjisë”, thuhet në komunikatë.
Gjithashtu OEK njofton se të hënën, përmes Shoqërisë së Avokatëve “Sejdiu & Qerkini”, do të publikohen edhe pesë aktvendime të tjera të cilat po ashtu kanë aprovuar kërkesat e bizneseve për pezullimin e vendimit të ZRRE-së.
“Oda Ekonomike e Kosovës mbetet e përkushtuar në mbështetjen ligjore të bizneseve dhe do të vazhdojë me ngritjen e padive përmes bashkëpunëtorëve të saj ligjorë dhe zyrës së juristëve të themeluar brenda OEK”, thuhet në fund të komunikatës.
