Festivali i njohur kulturor “Etno Fest” këtë vit do të zhvillohet nga data 10 deri më 20 korrik 2025 në fshatin Kukaj, duke shënuar edicionin e tij jubilar – 15 vjet aktivitet të pandërprerë. Përmes një vargu aktivitetesh të larmishme artistike dhe kulturore, Etno Fest do të vazhdojë të promovojë trashëgiminë dhe identitetin kulturor shqiptar në një atmosferë autentike dhe të gjallë.
Në një lidhje të drejtpërdrejtë për RTK, organizatorja Sheqerije Buçaj ndau emocionet dhe përkushtimin pas organizimit të këtij festivali që tashmë është kthyer në një pikë referimi për artin dhe kulturën në Kosovë:
“Si në teatër që deri në momentin e fundit punohet dhe gjithmonë deri në detaj, sepse është gjithçka e gjallë dhe gjithmonë e ke atë ndjenjën që a i kam bërë të gjitha gjërat mirë… kemi bërë një punë të jashtëzakonshme, por gjithmonë mendoj që mundemi edhe më mirë. Janë bërë 15 vjet, kemi arritur deri këtu me një punë shumë të madhe që e kemi bërë me një staf dhe njerëz me një përkushtim të jashtëzakonshëm,” tha Buçaj.
Ajo bëri të ditur se edicioni i sivjetëm ka për temë “Identitetin”, ndërsa theksoi edhe një risi të rëndësishme për këtë vit:
“Etno Festi e ka bazën dhe rrënjët e njëjta, struktura është gjithmonë ajo, veçse dallojnë programet dhe veçantitë që kemi çdo vit. E veçantë e këtij viti kemi si temë ‘Identitetin’, dhe këtë vit është edhe edicion jubilar, pra po i bëjmë 15 vite, dhe do ta promovojmë një skenë shumë të madhe, e cila do të ketë vend për 1000 veta, do të jetë e shtruar me një qëllim të madh. Po ashtu, poshtë asaj skene do të jetë ekspozita e Gëzim Muriqit,” u shpreh ajo.
Etno Fest edhe këtë vit pritet të sjellë një përvojë të pasur kulturore për vizitorët nga e gjithë Kosova dhe rajoni, duke krijuar një hapësirë unike për artin, traditën dhe reflektimin mbi identitetin kombëtar.
