Në profilin e saj, në rrjetin social X, Kos publikoi një videomesazh me rastin e shënimit të 30-vjetorit të gjenocidit në Srebrenicë, i cili u krye në korrik të vitit 1995 nga Ushtria e Republikës Srpska në “zonën e mbrojtur” të atëhershme të OKB-së.
“Sot jam në Srebrenicë për të nderuar viktimat e gjenocidit të kryer në këtë rajon 30 vjet më parë”, tha Kos.
Ajo shtoi se të paktën 8,372 boshnjakë u vranë sistematikisht, eshtrat e të cilëve u varrosën në varre masive për të mbuluar gjurmët e krimit të tmerrshëm, ndërsa shumë prej tyre ende listohen si të zhdukur.
“Srebrenica është një plagë e thellë në historinë evropiane. Është detyra jonë të kujtojmë, të ngremë zërin dhe të mos e largojmë kurrë shikimin kur ata që mbështesin urrejtjen vënë në pikëpyetje të drejtat e njeriut dhe minojnë dinjitetin e të tjerëve. Duhet t’u themi jo përçarjeve, jo urrejtjes, jo glorifikimit të kriminelëve të luftës. Në vend të kësaj, duhet të kthehemi drejt një të ardhmeje të përbashkët”, tha Kos.
Ju kujtojmë se mbetjet e shtatë viktimave të tjera të gjenocidit në Srebrenicë, të cilët u vranë në korrik të vitit 1995 nga pjesëtarët e Ushtrisë së Republikës Srpska dhe ndihmësit e tyre, do të varrosen sot si pjesë e një funerali kolektiv në Qendrën Përkujtimore në Potoçari.
