Policia e Kosovës ka arrestuar sot në flagrancë një zyrtar publik të gjendjes civile, i dyshuar për marrje ryshfeti.
Sipas njoftimit, Njësia Rajonale për Hetimin e Krimeve Ekonomike dhe Korrupsionit në Prishtinë, në koordinim me Prokurorinë kompetente, sot ka ndërmarrë veprime operative lidhur me një rast të dyshuar për marrje ryshfeti.
“Gjatë veprimeve hetimore është siguruar dëshmi relevante që çojnë në dyshimin se një zyrtar publik ka kërkuar dhe pranuar para në këmbim të një shërbimi zyrtar”, thuhet më tej në njoftim.
Policia ka ndërhyrë në momentin e pranimit të shumës së dyshuar si ryshfet dhe ka arrestuar të dyshuarin në flagrancë. “Tek i dyshuari janë gjetur dhe sekuestruar provat materiale relevante për rastin.”
Personi i arrestuar është intervistuar në prani të avokatit mbrojtës dhe “me urdhër të Prokurorit të Shtetit është ndaluar për 48 orë.” Rasti është cilësuar si “Marrje e ryshfetit”, sipas Kodit Penal të Republikës së Kosovës.
Hetimet lidhur me këtë rast janë duke vazhduar.
