Në emër të luftës së Ushtrisë Çlirimtare të Kosovës, buxheti i republikës u keqpërdor në mënyrë sistematike ndër vite. Disa ish-zyrtarë janë dënuar për keqpërdorim të detyrës zyrtare, ndërsa çështja vazhdon në gjykatë.
10 dekada më parë, kur nisën përpjekjet për ta nderuar financiarisht sakrificën e atyre që luftuan për atdheun, edhe ata që asnjëherë nuk ishin në fushëbetejë, arritën ta marrin statusin e veteranit.
U falsifikuan dokumente e u krijua skema e cila ndër vite vlerësohet se buxhetin e shtetit e ka dëmtuar për mbi 88 milionë euro.
E për këto miliona, personat që dyshohet se e keqpërdoren detyrën zyrtare sa ishin pjesë e Komisionit Qeveritar për Njohjen dhe Verifikimin e Statusit, u dënuan me nga 1 vit burgim nga Gjykata Themelore.
Të akuzuar janë: ish-kryeministri Agim Çeku, ish-ministri i Mbrojtjes, Rrustem Berisha, ish-deputeti Shkumbin Demalijaj, Nuredin Lushtaku, Sadik Halitjaha, Qelë Gashi, Shukri Buja, Ahmet Daku, Faik Fazliu, Smajl Elezaj, Fadil Shurdhaj dhe Xhavit Jashari.
Për rastin reagoi Elez Blakaj, ish-prokuroi i cili për herë të parë u mor me këtë çështje.
Ai ngriti akuza se procesi është devijuar përmes manipulimeve të qëllimshme, teksa u shpreh se për ata që kanë mashtruar e gënjyer, Apeli do ta kthejë rastin përsëri në rigjykim.
E për shkak të manipulimit me lista, Bedri Elezi thotë se asnjëherë nuk ka aplikuar për të qenë pjesë e skemës përfituese si veteran i UÇK-së.
Marrë parasysh dëmin e shkaktuar, Elezi deklaron se dënimi i Themelores është minimal.
Vendimin e Themelores e kanë cilësuar si të padrejtë ata që u dënuan.
Shukri Buja tha se do ta vazhdojë betejën ligjore deri në fund, teksa u shpreh se kjo betejë është e motivuar politikisht.
Të akuzuarit në rastin e veteranëve të rrejshëm nuk do të mbajnë dënimin derisa vendimi i Themelores të konfirmohet edhe nga Gjykata e Apelit.
Ndërkaq, nuk është e qartë se si do të veprohet me veteranët e rrejshëm, si dhe buxhetin e dëmtuar.
Qeveria e Kosovës është obliguar që përmes komisioneve të rishqyrtojë listën prej 19 mijë e 500 veteranëve.
Nga ekzekutivi i thanë RTK-së se ende nuk kanë pranuar aktgjykimin.
Sipas Agjencisë Statistikave të Kosovës, 37 mijë e 6 persona janë përfitues nga skema për veteranët e luftës.
Ekzekutivi këtë vit kishte marrë vendim për rritjen e pensioneve për 20% për kategoritë e dala nga lufta e fundit.
