UGSh kërkon zbardhjen e sulmit anonim mbi automjetin e gazetares Jonida Qirko në Gjirokastër

Sulmin anonim mbi automjetin e parkuar të gazetares Jonida Qirko, rreth orës 19.00 të ditës së mërkurë datë 16 Korrik 2025, në parkingun publik nëntokësor në Sheshin “Çerçiz Topulli” në Gjirokastër, UGSh e ka cilësuar si akt i kryer në rrethana dhe për arsye ende të pazbardhura nga persona të panjohur.
Kolegia Qirko pas denoncimit zyrtar pranë organeve të policisë së qytetit, sqaron për UGSH qarku Gjirokastër se :
“ Mbasditen e sotme rreth ores 19:00 në parkingun nëntokësor te sheshi i Çerçizit, kam parkuar makinen tip Benz, për të ndjekur disa veprimtari kulturore të organizuara në këtë shesh. Kur kam shkuar për ta marrë, kam parë se makina ime ka rënë pre e vandalitetit të njerëzve të papërgjegjshëm të cilët më kanë thyer xhamin anësor ndërsa kanë tentuar ta hapin.
Pretendoj se ngjarja është shkaktuar për shkak të detyrës sime si gazetare”.
Unioni i Gazetarëve Shqiptarë është vënë në dijeni se Policia e Gjirokastrës ka kryer procedurat e kqyrjes dhe vijon hetimet per zbardhjen e plotë të ngjarjes, identifikimin dhe kapjen e autorëve.
“Kërkojmë zbardhjen e shpejtë të këtij sulmi dhe të qëllimit të autorit apo autorëve ndaj automjetit të gazetares.
Dënojmë aktin dhe shprehim solidaritetin e plotë me kolegen e dëmtuar dhe të agresuar indirekt, prej autorëve ende anonimë” thekson në një deklaratë UGSh.