Është ngritur aktakuzë ndaj dy të pandehurve në Gjakovë, me inicialet A.T., dhe V.H., pas dyshimeve që kanë shantazhuar të dëmtuarën, B.H.
Në komunikatën e Prokurorisë Themelore në Gjakovë, bëhet e ditur se dy të pandehurit kanë kanosur të dëmtuarën se do të publikojnë informacione, të cilat do të prishin imazhin e saj. Ata i kanë kërkuar të holla materiale në vlerë prej 5 mijë eurosh.
“Sipas kërkesës së Prokurorisë, ndër të tjera ceket se ekziston dyshimi i bazuar se të pandehurit A.T., dhe V.H., ditë me parë e deri me datën 18.07.2025, të koordinuar paraprakisht në mes vete me qëllim të përfitimit të kundërligjshëm të dobisë pasurore për vete, kanosin personin tjetër – këtu të dëmtuarën B.H., se do të zbulojë diçka në lidhje me të, që do të dëmtojë rëndë nderin dhe autoritetin e saj, në atë mënyrë që ditën kritike pasi e pandehura V.H., një javë me parë e kishte telefonuar të dëmtuarën, duke iu drejtuar me fjalët ,, unë kam fakte qe ti ke kaluar me 2 – 3 persona dhe nëse nuk mi dërgon 5000 euro këto prova do të ia dërgoj burrit tënd’’, e me pas ditën kritike e kishte telefonuar përsëri duke i thënë ,, a vendose për pare’’ por që e dëmtuara me qellim qe të kuptoj se ç’far po ndodh i përgjigjet ,, po ku donë me ti pru paret a qysh ,, pastaj e pandehura e udhëzon se ,, vjen i bjen në qendrën tregtare V. ne katin e tret lej dikund në tesha me trego ku janë dhe shkoj i marr”, thuhet në komunikatë.
Zyrtarët policorë të ndodhur në atë qendër tregtare kanë arritur që të intervenojnë te rasti dhe pas pak çastesh arrestohet edhe i pandehuri A.T., i cili kishte ardhur aty.
“Me këto veprime formohet dyshimi i bazuar se të pandehurit kanë kryer veprën penale, Shantazhi nga neni 329 par. 1 lidhur me nenin 31 dhe 28 të KPRK-së”, vazhdon komunikata.
