Kryetari i Lidhjes Demokratike të Kosovës, Lumir Abdixhiku, ka reaguar ndaj situatës së financimit të Radiotelevizionit të Kosovës, duke thënë se transmetuesi publik po përballet padrejtësisht me masa, që ai u quajti politike,
“Mendoj që një parti të cilën e keni mbështetur shumë ju si televizion, dhe keni duruar aq shumë kapje brenda institucionit, prapë padrejtësisht ju bën këtë veprim,” tha Abdixhiku në një deklaratë për media.
Ai kërkoi që gazetarët të jenë më të zëshëm dhe më të guximshëm në mbrojtje të pavarësisë editoriale dhe kundër ndërhyrjeve politike.
“Do të doja që nga gazetarët mendje-lirë të RTK-së, si një shtyllë e rëndësishme e medias së lirë, të kishte pasur zë edhe atëherë kur militantët partiakë vendoseshin në krye të drejtorëve dhe bordeve. Ju lutem, herën tjetër të jeni më të guximshëm, të bëni rezistencë. Jeni gazetarë, para vetes keni një gjeneratë që i ka bërë ballë çdo presioni. Mos u frikësoni, populli i Kosovës e do lirinë,” theksoi ai.
Abdixhiku gjithashtu ngriti shqetësimin për bllokimin e financave në disa komuna që udhëhiqen nga LDK, duke përmendur konkretisht Prishtinën, Pejën dhe Fushë-Kosovën.
“Përveç RTK-së, të gjitha komunat që drejtohen nga LDK janë të bllokuara financiarisht. Kryeqyteti është i bllokuar me vendim të Ministrisë së Financave dhe kryeministrit në detyrë, Albin Kurti. Financat e Prishtinës, Pejës, Fushë-Kosovës janë bllokuar pa asnjë arsye,” tha ai, duke e cilësuar këtë si një qasje destruktive që po shkakton përplasje institucionale në vend.
