Në një deklaratë të PËRBASHKËT, 115 organizata e përshkruan mungesën e rëndë të ushqimit në Gaza si “uri masive”, duke theksuar se “rrethimi izraelit po i vuan njerëzit e Gazës nga uria”, raporton ABC News .
Organizatat paralajmëruan se disa punonjës humanitarë në Gaza tani po presin në radhë për ushqim, duke deklaruar se “rrezikojnë të qëllohen vetëm për të ushqyer familjet e tyre”. Sipas Kombeve të Bashkuara, të shtënat e përsëritura vdekjeprurëse rreth qendrave të shpërndarjes së ndihmave kanë rezultuar në vdekjen e qindra njerëzve.
Sipas një deklarate nga Ministria e Shëndetësisë në Rripin e Gazës të sunduar nga Hamasi, dhjetë palestinezë kanë vdekur nga uria dhe kequshqyerja në 24 orët e fundit.
“Në dy ditët e fundit, 25 persona kanë vdekur nga uria”
Ndërsa një total prej 111 personash kanë vdekur nga uria që nga fillimi i luftës, 25 prej tyre, përfshirë të paktën katër fëmijë, kanë vdekur vetëm në 48 orët e fundit, tha ministria. Organizatat e ndihmës thonë se furnizimet me shumë artikuj thelbësorë tani janë shterur plotësisht.
Duke cituar raportet e mjekëve, deklarata paralajmëron për “shkallë rekord të kequshqyerjes akute”, veçanërisht tek fëmijët dhe të moshuarit. Një punonjës ndihme që ofron mbështetje psikosociale tha: “Fëmijët po u thonë prindërve të tyre se duan të shkojnë në parajsë, sepse të paktën atje ka ushqim”.
Mjekët pa Kufij, Save the Children dhe Oxfam International janë ndër organizatat humanitare ndërkombëtare që e kanë nënshkruar këtë deklaratë.
