Veprimin e presidentes, Vjosa Osmani që një ditë më parë vendosi t’i drejtohej Gjykatës Kushtetuese e ka vlerësuar Instituti Demokratik i Kosovës, por sipas tyre, kërkesa pak ditë para përfundimit të afatit 30-ditor, ngre disa dilema. KDI e ka quajtur kërkesën për masë të përkohshme, të paarsyeshme.
“Megjithatë, kërkesa e Presidentes për interpretim nga Gjykata Kushtetuese, e paraqitur vetëm pak ditë para përfundimit të afatit 30-ditor, ngre disa dilema. Fillimisht, është e paqartë se ku qëndron pretendimi për “konflikt të kompetencave” mes Presidencës, Kuvendit dhe Qeverisë në këtë moment, përderisa afati ende nuk ka përfunduar, dhe Kuvendi ka ende hapësirë për të përmbushur detyrimin e tij për konstituim. Në këtë kuptim, kërkesa duket se paragjykon rezultatin e ditëve të mbetura dhe dobëson pritshmërinë që deputetët ta përmbushin përgjegjësinë e tyre”, thotë KDI-ja.
Sipas tyre, pyetja “çfarë ndodh pas 30 ditësh?” është një çështje që ka mundur dhe është dashur të sqarohej menjëherë pas shpalljes së aktgjykimit, në mënyrë, siç thonë ata, të sigurohej qartësi mbi pasojat juridike të moskonstituimit të Kuvendit.
“Në anën tjetër, kërkesa për pezullim të afatit kushtetues, në formën e një mase të përkohshme, duket e paarsyeshme, meqë e njëjta iu mundëson “komoditet”, për mosveprim subjekteve parlamentare dhe deputetëve”, thotë ky institut.
KDI konsideron që aktgjykimi i 26 qershorit është i qartë dhe ka përcaktuar afatin 30-ditor si detyrues dhe substancial për subjektet parlamentare.
“Në fakt, mosrespektimi i afatit përbën një dështim për të përmbushur një detyrim themelor kushtetues”, vijon tutje komunikata.
sipas KDI-së, respektimi i dispozitave dhe afateve kushtetuese është një nga shtyllat themelore të rendit demokratik, meqë, thonë se ato synojnë të parandalojnë bllokada institucionale dhe të orientojnë akterët drejt zgjidhjeve.
“Andaj, ftojmë subjektet parlamentare të tregojnë përgjegjësi, të respektojnë Kushtetutën dhe të ndërmarrin veprimet e nevojshme për të përmbushur detyrimet e tyre brenda afateve. Ndërkohë, Gjykata Kushtetuese mund të qartësojë pasojat e skadimit të afatit, por nuk mund të shërbejë si mekanizëm për të pezulluar përgjegjësinë politike”, thotë KDI-ja.
