Policia e Kosovës njofton de ka realizuar me sukses operacionin e ekstradimit të një shtetasi kosovar nga Gjermania, i cili ishte i kërkuar nga organet e drejtësisë së Kosovës.
Sipas njoftimit të Drejtorisë Rajonale të Policisë në Prishtinë, mbrëmjen e djeshme, në Aeroportin Ndërkombëtar të Prishtinës, njësia për menaxhimin e urdhëresave dhe arrestimeve ka pranuar shtetasin L.M., mashkull, 27 vjeç, i cili ishte ekstraduar nga autoritetet gjermane.
L.M. ishte subjekt i një urdhërese aktive të lëshuar nga gjykatat kosovare për veprën penale “vjedhje e rëndë” dhe ishte dënuar me një vit e gjashtë muaj burgim. Pas përfundimit të të gjitha procedurave të nevojshme ligjore, ai është shoqëruar dhe dorëzuar në Qendrën e Paraburgimit në Hajvali, për të vazhduar vuajtjen e dënimit të shqiptuar.
Policia e Kosovës ka theksuar se operacioni është përmbyllur pa asnjë incident dhe në përputhje të plotë me standardet profesionale.
