Vetëm për katër ditë, në Gjakovë, policia ka kapur 63 shoferë të cilët mjetin po e drejtonin nën ndikimin e alkoolit. Në kuadër të planit operativ “Alkooli” policia thotë se u testuan me alkool-test 365 drejtues mjetesh.
E gjithë kjo sipas policisë u bë me qëllim parandalimin e ngasjes nën ndikimin e alkoolit dhe reduktimin e aksidenteve.
“Gjatë kësaj periudhe janë testuar me alkool-test gjithsej 385 drejtues mjetesh. Nga këta, 63 shoferë janë kapur duke drejtuar mjetin nën ndikimin e alkoolit, në kundërshtim me normat ligjore të lejuara. Për ta, përveç gjobës, është shqiptuar edhe masa mbrojtëse e ndalimit të drejtimit të mjetit me veprim motorik dhe u janë marrë përkohësisht patentë-shoferët, për kohëzgjatjen e paraparë me ligj”.
Kanë treguar se Njësia Rajonale e Komunikacionit Rrugor, krahas këtyre kontrolleve, është duke zhvilluar aktivitete vetëdijësuese dhe preventive në kuadër të planit operativ “Sezoni Veror”, me fokus në kundërvajtjet që paraqesin rrezik më të madh për sigurinë rrugore, përfshirë ngasjen me shpejtësi të lartë, tejkalimet e rrezikshme, përdorimin e telefonit gjatë ngasjes, mos vendosjen e rripit të sigurisë dhe helmetës mbrojtëse, si dhe shkelje të tjera që rrezikojnë jetën dhe pronën e qytetarëve.
“Drejtoria Rajonale e Policisë-Gjakovë apelon tek të gjithë pjesëmarrësit në komunikacion që të respektojnë me përpikëri rregullat e trafikut, të shmangin çdo veprim që rrezikon sigurinë dhe të bashkëpunojnë me autoritetet për një ambient të sigurt rrugor. Çdo shkelje e Ligjit për Rregullat e Trafikut Rrugor do të sanksionohet sipas dispozitave ligjore në fuqi”, paralajmëron policia.
