Presidenti Ismet Krasniqi ka pritur të dielën drejtuesit e Unionit Evropian të Taekwondosë (ETU), Ali Sagirkaya, auditor në WT dhe kryetar i Komitetit të Lojërave në ETU dhe Ioannis Mourotsos, drejtor sportiv në ETU dhe anëtar i Komitetit të Lojërave, të cilët shoqëroheshin nga udhëheqësit e Federatës së Taekwondosë së Kosovës (FTK), kryetari Arsim Agushi dhe sekretarja e përgjithshme, Rilinda Gjonbalaj.
Drejtuesit e ETU-s ndodhen në Kosovë për të verifikuar hapësirat, në të cilat do të organizohet këtë vit Kampionati Europian U21 i taekwondosë, i cili i është besuar FTK-së.
“Presidenti Krasniqi, duke i falënderuar ETU-n për besimin e dhënë FTK-së, shprehu përkrahjen e KOK-ut në organizimin e kësaj ngjarje, e cila krahas zhvillimit dhe masivizimit të taekwondosë në Kosovë, do të jetë mundësi e mirë e promovimit të shtetit të Kosovës”, thuhet në njoftimin e KOK-ut.
Sipas këtij njoftimi, palët biseduan edhe për bashkëpunimin e KOK-ut me FTK-në, dhënien e bursave për taekwondistë, sukseset e sportit tonë në arenën ndërkombëtare, Lojërat Mesdhetare Prishtina 2030, etj.
