Agjencia Kosovare e Privatizimit ka bërë të ditur se Dhoma e Posaçme e Gjykatës Supreme të Kosovës ka aprovuar përmbylljen e procesit të likuidimit për ndërmarrjen shoqërore GJI015 KB “Cërrnica”, me seli në Cërrnicë të Gjilanit.
Ky vendim vjen pas miratimit të Raportit Përfundimtar nga Gjykata, ndërsa Agjencia njofton se me këtë numri i ndërmarrjeve të likuiduara plotësisht ka arritur në 61.
Në njoftim thuhet se raporti përfundimtar është i publikuar në faqen zyrtare të Agjencisë Kosovare të Privatizimit.
“Në afat prej 15 ditësh nga data e këtij vendimi mund të parashtrohen ankesa, përndryshe vendimi bëhet i plotfuqishëm dhe njoftimet përmbyllëse do t’i dërgohen institucioneve relevante”, thuhet në njoftimin e AKP-së.
