Policia e Kosovës, përmes Drejtorisë për Hetimin e Krimeve Ekonomike dhe Korrupsionit (DHKEK) në Prishtinë, ka arrestuar dy shtetas të Shqipërisë në pikën kufitare në Vërmicë, si të dyshuar për veprën penale të falsifikimit të parasë.
Sipas Policisë, hetimet filluan pas informacioneve se të dyshuarit ishin furnizuar me derivate në një pikë karburanti, duke paguar 50 euro në kartëmonedha nga 10 euro, prej të cilave 4 rezultuan të falsifikuara.
“Falë reagimit të shpejtë dhe koordinimit mes njësive policore, veçanërisht të Njësisë për Mbështetje të Trafikut Rrugor, të dyshuarit u ndaluan në Pikën Kufitare në Vërmicë – Prizren, ku u arrestuan në flagrance”, thuhet në njoftim.
Gjatë kontrollit të automjetit të tyre, policia gjeti edhe 780 euro të tjera, të gjitha të dyshuara si të falsifikuara.
Pas intervistimit në prani të avokatëve, me vendim të prokurorit njëri nga të dyshuarit është dërguar në mbajtje për 48 orë për veprën penale falsifikim i parasë, ndërsa tjetri është liruar dhe do të hetohet në procedurë të rregullt.
Policia e Kosovës rithekson përkushtimin për luftimin e veprave penale dhe bashkëpunimin e ngushtë mes njësive për të garantuar sigurinë dhe rendin publik.
