Lëvizja Vetëvendosje ka bërë të ditur se në zgjedhjet lokale të 12 tetorit në garën për kryetar të Komunës së Hanit të Elezit do ta mbështesë kandidatin e pavarur, Refki Suma.
Ish-kryetari i Komunës së Hanit të Elezit, Refki Suma ka vendosur t’i hyjë garës për kreun e kësaj komune në zgjedhjet e 12 tetorit si kandidat i pavarur nën moton “Gjithnjë në shërbim të popullit”. Megjithatë, ai në këtë garë do ta ketë mbështetjen e një subjekti politik. Në fakt, Lëvizja Vetëvendosje ka bërë të ditur se ka vendosur ta mbështesë kandidatin e pavarur, Refki Suma për kryetar komune.
“Sot, Qendra jonë në Han të Elezit ka përfunduar me sukses finalizimin e listës së kandidatëve për Asamblenë Komunale për zgjedhjet lokale që do të mbahen më 12 tetor. Pas një procesi të brendshëm konsultativ dhe vlerësues, kemi vendosur që për garën për Kryetar Komune të mbështesim kandidatin e pavarur Rufki Suma. Kjo mbështetje vjen si rezultat i një vlerësimi të përbashkët për angazhimin, përvojën dhe vizionin e tij për zhvillimin e komunës sonë”, thuhet në njoftimin e Vetëvendosjes.
Tutje ky subjekt politik ka bërë të ditur se do të jetë gjithmonë në krah të qytetarëve dhe përkrah çdo nisme që synon përmirësimin e jetës së tyre dhe funksionimin demokratik të institucioneve lokale.
“Kam vendosur t’i hyjë garës për kryetar të komunës së Hanit të Elezit që do të mbahen më 12 tetor të këtij viti. Ashtu sikurse mandatet e kaluara që bashkërisht me ju dhe donatorët vendorë dhe ndërkombëtarë që realizuam projektet e shumta në interesin tuaj, ashtu edhe në të ardhmen, me ndihmën e Zotit dhe donatorëve si vendorë ashtu edhe ndërkombëtarë, bashkërisht me ju do të realizojmë projektet që do të përcaktohen nga ana e juaj nëpër debatet publike”, ka theksuar Suma, i cili ishte në krye të Komunës së Hanit të Elezit në tri mandate, nga viti 2009 deri në vitin 2021.
Ai ka bërë një lutje për të gjithë qytetarët e kësaj komune, pa dallime partiake, që të mos etiketojnë apo të fyejnë kandidatët qoftë për kryetar apo këshilltarë të kuvendit komunal.
“Ju duhet të votoni vetë sipas bindjes tuaj të lirë, pa ndikim e pa presion nga askush, votoni ata që ju mendoni se është më i miri dhe punon për interesin e komunës suaj”, ka shtuar Suma.
Në zgjedhjet e fundit fitues doli kandidati i PDK-së, Mehmet Ballazhi.
