Lëvizja Vetëvendosja ka publikuar listën e kandidatëve për Kuvendin e Komunës së Prishtinës, në zgjedhjet e 12 tetorit. Listës me 56 kandidatë i prin kandidatja për asamblistë, Mrika Limani-Myrtaj.
Kandidati për kryetar të Prishtinës i LVV-së, Hajrulla Çeku, ka prezantuar listën e kandidatëve për asamblenë komunale, duke e cilësuar atë si “listën e fitores së përbashkët”, me theks të veçantë në barazinë gjinore dhe përfaqësimin e qytetarëve me integritet.
Sipas tij, 48% e kandidatëve në listë janë gra, ndërsa gjashtë prej tyre zënë vend në dhjetëshen e parë, çka sipas tij dëshmon se përfshirja gjinore nuk është thjesht një simbolikë politike, por pjesë thelbësore e platformës së tij.
“Po e bëjmë të qartë se barazia gjinore nuk është dekor, por bosht i vizionit tonë politik. Kjo është lista e fitores së përbashkët, që sjell dijen dhe përvojën e njerëzve të ndershëm, guximin e atyre që sfidojnë padrejtësitë dhe integritetin e atyre që nuk shiten e nuk blihen,” ka deklaruar Çeku përmes një postimi në rrjete sociale.
Ai ka theksuar se synimi i tij është të rikthejë qeverisjen komunale në shërbim të qytetarëve të zakonshëm, e jo të një pakice të privilegjuar.
“Një listë që do ta kthejë qeverisjen e kryeqytetit në shërbim të shumicës, jo të pakicës së privilegjuar. Për Prishtinën tonë të barabartë, të gjallë dhe të drejtë,” ka shtuar ai.
