Departamenti Amerikan i Shtetit ka vlerësuar se në vendet e Ballkanit Perëndimor janë të kufizuara liria e shprehjes dhe e medies. Në raportin e tij të publikuar mbrëmë, DASH në pjesën për Kosovën, ka përmendur se Asociacioni i Gazetarëve të Kosovës ka raportuar se ka qenë disa herë shënjestër e fushatave të shpifjeve, kur ka mbrojtur gazetarë dhe medie.
Aty theksohet po ashtu se deri në shtator AGK-ja ka raportuar 53 raste kur zyrtarë qeveritarë, liderë politikë, stafi gjyqësor, interesat biznesore, kriminelë të dyshuar, protestues dhe grupe fetare i kanë sulmuar fizikisht apo verbalisht gazetarët, duke ua dëmtuar pajisjet, apo duke kryer sulme kibernetike kundër medieve.
Departamenti Amerikan i Shtetit ka publikuar raportin për respektimin e të drejtave të njeriut në botë për vitin 2024.
Në pjesën për Kosovën, u theksua se Qeveria ka ndërmarrë hapa të besueshëm por jo të qëndrueshëm në identifikimin, hetimin, ndjekjen penale dhe ndëshkimin e zyrtarëve që kanë kryer shkelje të të drejtave të njeriut.
Në pjesën për ‘Krime lufte, krime kundër njerëzimit dhe dëshmi për akte që mund të përbëjnë gjenocid’, raporti përmend se nga 1 janari deri më 2 dhjetor, Gjykata Themelore e Prishtinës dënoi katër ish-pjesëtarë të forcave serbe për krime lufte.
Tutje, në pjesën për lirinë e medias, është përmendur se Asociacioni i Gazetarëve të Kosovës ka raportuar se ka qenë disa herë shënjestër e fushatave të shpifjeve, kur ka mbrojtur gazetarë dhe media.
“AGK-ja ka raportuar se zyrtarë qeveritarë, përfshirë kryeministrin dhe pjesëtarë të partisë politike në pushtet janë përfshirë në fushata shpifjeje për të minuar besimin e publikut në media”, thuhet në raport.
Aty theksohet po ashtu se deri në shtator AGK-ja ka raportuar 53 raste kur zyrtarë qeveritarë, liderë politikë, stafi gjyqësor, interesat biznesore, kriminelë të dyshuar, protestues dhe grupe fetare i kanë sulmuar fizikisht apo verbalisht gazetarët, duke ua dëmtuar pajisjet, apo duke kryer sulme kibernetike kundër mediave.
“Gazetarët pohuan se presioni prej politikanëve dhe grupeve të organizuara kriminale ka rezultuar shpesh me vet censurë. Disa gazetarë janë shmangur nga hulumtimet për shkak të frikës për sigurinë fizike apo sigurinë në punë. Herë pas here, gazetarët kanë marrë oferta për përfitime financiare në këmbim të raportimeve pozitive ose për të braktisur hulumtime”, është thënë, mes tjerash, në raport.
Në pjesën për të drejtat e punëtorëve, raporti thekson se dyshohet për shkelje të standardeve Sigurisë dhe Shëndetit në Punë (OSH) në sektorin e ndërtimit, për shkak se punëtorët shpesh punonin në lartësi të rrezikshme dhe pa pajisje të duhura sigurie.
Kur flitet për sigurinë, raporti thotë se ka pasur shqetësime lidhur me sjelljen e policisë gjatë vitit 2024, ku përmenden ankesa ndaj policisë që kryesisht përfshinin keqtrajtime, përdorim të tepruar të forcës, keqpërdorim të detyrës zyrtare e të tjera.
Në pjesën për mbrojtjen e të drejtave të fëmijëve, theksohet se megjithëse nuk ka të dhëna zyrtare për martesat e hershme dhe të detyruara të fëmijëve, kjo është praktikë e zakonshme, përfshirë në komunitetet Romë, Ashkali, Egjiptian, Boshnjak dhe Goran.
Raporti ka theksuar se Qeveria bashkëpunoi me Zyrën e Komisionarit të Lartë të Kombeve të Bashkuara për Refugjatët (UNHCR) dhe organizata të tjera humanitare për të siguruar mbrojtje dhe ndihmë refugjatëve si dhe personave të tjerë në nevojë.
