Në kuadër të hetimeve për arratisjen e Gjorgje Radomiroviqit nga Qendra e Paraburgimit në Mitrovicë, sot është pezulluar nga puna edhe një oficer korrektues, i cili edhe është arrestuar nga Policia e Kosovës.
Lajmin e ka bërë të ditur ministrja në detyrë e Drejtësisë, Albulena Haxhiu përmes një postimi në Facebook.
Ajo ka thënë se numri i zyrtarëve të pezulluar tani arrin në gjashtë, duke përfshirë drejtorin e Qendrës, një mbikëqyrës të lartë dhe katër zyrtarë korrektues.
“Si ministre e Drejtësisë, ritheksoj se askush nuk është mbi ligjin. Çdo shkelje do të trajtohet me vendosmëri, duke garantuar llogaridhënie dhe siguri në të gjitha institucionet korrektuese”, ka shkruar tutje Haxhiu.
Radomiroviq është arratisur nga Qendra e paraburgimit në Mitrovicë,pasditen e 7 gushtit. Ai ishte i dënuar me 14 vjet e 6 muaj burgim për vrasje, nga të cilat i kishin mbetur edhe 3 vjet e 7 muaj.
