Agjencia e Menaxhimit Emergjent ka njoftuar se gjatë 12 orëve të fundit janë regjistruar gjithsej 61 vatra zjarri në vend. Prej tyre, 9 vazhdojnë të jenë aktive, ndërsa 52 janë lokalizuar me sukses nga Njësitë e Zjarrfikësve dhe strukturat mbështetëse.
Sipas AME-së menaxhimi i situatës po bëhet në koordinim të ngushtë me Njësitë e Zjarrfikjes, Qendrat Operative 112 dhe Policinë e Kosovës.
Agjencia ka potencuar se vlerësimet aktuale tregojnë se situata është e menaxhueshme.
“Nga vlerësimet dhe analizat e bëra, situata paraqitet e menaxhueshme, pasi të gjitha vatrat aktive janë nën monitorim të vazhdueshëm dhe ekipet zjarrfikëse janë në terren”, thuhet në njoftim.
AME ka shprehur mirënjohje për përkushtimin e treguar nga Zjarrfikësit, Policia e Kosovës, KFOR-i, komunat dhe qytetarët që kanë ndihmuar në menaxhimin e kësaj situate.
