Në stacionin policor në Ferizaj është raportuar një rast i “Lëndimit të lehtë trupor”, ku viktima është një grua 32-vjeçare.
Sipas deklaratës së saj, ajo është keqtrajtuar fizikisht në shtëpinë e saj nga vjehrri 62-vjeçar dhe vajza e tij 20-vjeçare, pas një mosmarrëveshjeje lidhur me pronësinë e një veture. Si pasojë e incidentit, viktima ka pësuar lëndime të lehta trupore dhe ka marrë trajtim mjekësor.
“Njësiti i hetimeve ka reaguar menjëherë duke dalë në vendin e ngjarjes. Gjatë kontrollit në shtëpi është gjetur dhe sekuestruar një armë zjarri – një pushkë automatike me dy karikatorë, e cila dyshohet se mbahej pa leje”, thuhet në njoftim.
Dy personat e dyshuar janë shoqëruar në stacionin policor dhe janë intervistuar nga hetuesit. Me vendim të prokurorit të shtetit, ndaj tyre janë iniciuar hetime për veprat penale “Lëndimi i lehtë trupor” dhe “Mbajtja në pronësi, kontroll ose posedim të paautorizuar të armëve”.
Pas intervistimit, të dyshuarit janë liruar dhe procedura ndaj tyre do të vazhdojë në mënyrë të rregullt.