Si Ukraina ashtu edhe Rusia do të duhet të bëjnë lëshime për të arritur një marrëveshje paqeje, tha Sekretari i Shtetit i SHBA-së, Marco Rubio, për Fox News pas një takimi në Shtëpinë e Bardhë midis Donald Trump, Volodymyr Zelensky dhe udhëheqësve evropianë.
Në çdo negociatë që synon t’i japë fund një lufte apo çdo konflikti, të dyja palët jo vetëm duhet të marrin, por edhe të japin, theksoi Rubio.
“Do të ketë disa lëshime që secila palë do të duhet të bëjë. Dhe padyshim çështja e tokës ose se ku i vendosni ato vija ndarëse – ku mbaron lufta – do të jetë pjesë e asaj bisede”, tha ai.
“Në thelb, asnjëra palë nuk do të marrë 100% këtu”, theksoi Rubio, duke shtuar se kjo nuk është “e lehtë” dhe ndoshta “e padrejtë”, por se është e vetmja mënyrë për t’i dhënë fund luftës.
Sekretari i Shtetit i SHBA-së vuri në dukje se do t’u takon Ukrainës dhe Rusisë të vendosin për kushtet e përfundimit të luftës, dhe roli i Shteteve të Bashkuara është ta bëjë të mundur diskutimin, “dhe të sigurohet që të dyja palët po flasin”.
Presidenti i SHBA-së, Donald Trump, u takua me Presidentin ukrainas Volodymyr Zelensky dhe udhëheqësit evropianë në Shtëpinë e Bardhë mbrëmjen e 18 gushtit. Më 15 gusht, Trump zhvilloi bisedime të ndara në Alaska me Presidentin rus Vladimir Putin.
Zyrtarisht, detajet e bisedimeve të Trump me Putinin dhe Zelenskyn nuk u raportuan. Sipas mediave amerikane, Putin tha se Ukraina duhet t’ia dorëzojë të gjithë Donbasin Rusisë, përfshirë territoret e kontrolluara nga Kievi. Presidenti ukrainas ka thënë më parë në shumë raste se heqja dorë nga çdo pjesë e vendit është e pamundur.
Pas takimit në Shtëpinë e Bardhë, Trump tha se kishte filluar përgatitjet për një takim midis Putinit dhe Zelenskyt.
