Kaja Kallas: Paketa e re e sanksioneve kundër Rusisë duhet të jetë gati deri në shtator

Shefja e diplomacisë evropiane, Kaja Kallas, tha se Bashkimi Evropian do të vazhdojë të synojë ekonominë e luftës së Rusisë dhe se paketa e ardhshme e sanksioneve kundër Moskës duhet të jetë gati deri muajin tjetër, raporton The Guardian .

Duke folur pas një samiti virtual të Këshillit Evropian mbi luftën në Ukrainë, një ditë pas një takimi të jashtëzakonshëm të udhëheqësve ukrainas dhe disa evropianë me Presidentin e SHBA-së Donald Trump në Uashington, Kallas theksoi se “uniteti midis udhëheqësve të BE-së në samitin virtual të sotëm ishte i prekshëm”.

“Nuk mund t’i besohet Putinit se do të mbajë asnjë premtim”

Ajo shtoi se i ka vënë temat e sigurisë së Ukrainës dhe sanksioneve kundër Rusisë në krye të axhendës për bisedimet javën e ardhshme midis ministrave të jashtëm dhe të mbrojtjes të Evropës.

“(Vladimir, red.) Putinit nuk mund t’i besohet se do të mbajë ndonjë premtim apo angazhim. Prandaj, garancitë e sigurisë duhet të jenë mjaftueshëm të forta dhe të besueshme për ta penguar Rusinë të riorganizohet dhe të sulmojë përsëri”, shkroi Kallas në rrjetin social X.

Uniteti midis udhëheqësve të BE-së në Samitin virtual të sotëm ishte i prekshëm.
Të gjithë janë të përkushtuar për një paqe të qëndrueshme që mbron interesat jetësore të sigurisë si të Ukrainës ashtu edhe të Evropës.
— Kaja Kallas (@kajakallas) 19 gusht 2025

Kallas theksoi se paketa e sigurisë do të përfshijë trajnimin e ushtarëve ukrainas, forcimin e forcave të armatosura dhe zhvillimin e industrisë së mbrojtjes vendase. Ajo shtoi se sanksionet do të vazhdojnë të synojnë ekonominë e luftës së Rusisë.