Qeveria gjermane u ka kërkuar autoriteteve në Serbi të sqarojnë sulmet ndaj demonstruesve dhe gazetarëve gjatë protestave antiqeveritare. Sidomos duke pasur parasysh që Serbia është kandidate për anëtarësim në BE, vendi është “i detyruar t’i përmbahet parimeve të sundimit të ligjit”, tha zëdhënësi i Ministrisë së Punëve të Jashtme në Berlin. Në këtë kontekst, Qeveria Federale këmbëngul në sigurimin e lirisë së tubimit.
“Po e ndjekim me shumë kujdes situatën në Serbi”, tha zëvendëszëdhënësi i qeverisë Steffen Mayer. Mayer hodhi poshtë akuzat se Berlini injoron mangësitë e demokracisë në Serbi për hir të interesave ekonomike.
“Nuk mund të bëhet fjalë për heshtje”, tha ai. Arsyeja për këto kritika është plani i përbashkët i qeverisë së Serbisë dhe BE-së për të hapur një nga depozitat më të mëdha të litiumit në Evropë në Jadra në perëndim të vendit. Le t’ju kujtojmë se kundër asaj miniere u mbajtën protesta masive.
Gjatë protestave kundër Presidentit Aleksandar Vuçiç dhe qeverisë së tij, në javët e fundit ka pasur disa përleshje të dhunshme midis demonstruesve dhe policisë, por edhe midis demonstruesve dhe mbështetësve të Vuçiçit. Mediat e pavarura në Serbi e shoqërojnë përshkallëzimin e fundit me provokatorët nga Partia Progresive Serbe (SNS) në pushtet. Sipas Zeit.de, dyshohet se ata, me ndihmën e policisë dhe shërbimeve të sigurisë, shkaktojnë incidente të dhunshme në demonstrata .
Arrestime dhe lëndime të shumta
Valët e protestave filluan në nëntor të vitit të kaluar, kur 16 persona vdiqën në Novi Sad pas shembjes së tendës së stacionit hekurudhor. Demonstratat filluan më pas me kërkesën për të zbuluar shkaqet e aksidentit dhe më vonë u shndërruan në një rebelim masiv kundër qeverisë dhe korrupsionit të përhapur gjerësisht. Protesta më e madhe deri më tani u zhvillua në mesin e marsit, kur rreth 300,000 njerëz, kryesisht studentë dhe të rinj, dolën në rrugë.
Protestat janë forcuar përsëri ditët e fundit, jo vetëm në Beograd, por edhe në Novi Sad dhe Valjevo. Në atë rast, pati arrestime dhe lëndime të shumta. Policia është akuzuar për përdorim të tepruar të forcës dhe arrestime arbitrare. Përveç kësaj, demonstruesit antiqeveritarë u vunë në shënjestër të përsëritur nga mbështetës të maskuar të qeverisë.
Javën e kaluar, Vuçiç njoftoi pasoja të ashpra për pjesëmarrësit në protestë. Ai përsëriti vazhdimisht, pa asnjë provë, se demonstratat, të cilat kanë vazhduar prej muajsh, dyshohet se po orkestrohen nga Perëndimi, me qëllim destabilizimin e Serbisë. “Vendi ynë është në rrezik të madh, ata kanë kërcënuar të gjitha vlerat tona, jetën normale dhe çdo individ”, tha Vuçiç.
