E ngarkuara me punë në Ambasadën Amerikane, Anu Prattipati, pas takimit që ka pasur me kryeministrin në detyrë, Albin Kurti ka deklaruar se është shumë me rëndësi që serbët e Kosovës të përfshihen në procesin zgjedhor të 12 tetorit.
Ajo pas takimit me Kurtin në një prononcim për media ka thënë se ia ka shprehur kreut të ekzekutivit shqetësimin për veprimet që mund t’ua ndalojnë partive serbe pjesëmarrjen në zgjedhjet lokale.
“Kemi diskutuar për veprimet, që kuptojmë se kryeministri në detyrë dhe Lëvizja Vetëvendosje, po shqyrtojnë t’i përjashtojnë disa nga partitë politike nga pjesëmarrja në zgjedhjet lokale të ardhshme. Të jemi të qartë, besojmë që të gjithë qytetarët e Kosovës duhet të kenë mundësinë e plotë të zgjedhin përfaqësuesit e tyre të zgjedhur. Është shumë me rëndësi që serbët e Kosovës të përfshihen në këtë proces dhe jemi të shqetësuar për çdo tentim që limiton zgjedhjet e tyre. Ia kam bërë të qartë këto pika kryeministrit në detyrë dhe kam nënvizuar vëmendjen e SHBA-së për këtë çështje”, ka thënë Prattipati.
