Me rastin e 115-vjetorit të lindjes së Shën Nënë Terezës dhe 20-vjetorit të bekimit të gurthemelit të Katedrales “Shën Nënë Tereza” në Prishtinë, Ipeshkvia Prizren-Prishtinë, në bashkëpunim me Qendrën për Trashëgimi Shpirtërore dhe Kulturore (QTSHK), organizon një koncert solemn më 26 gusht 2025, në orën 19:30, në Katedralen “Shën Nënë Tereza” në Prishtinë.
Ky aktivitet do të shënojë dy momente të rëndësishme: lindjen e shenjtores shqiptare me famë botërore dhe dy dekada nga vendosja e themeleve të një prej objekteve më të rëndësishme të kultit katolik në vend.
Programi përfshin ligjërata, dokumentar me fotografi dhe video, si dhe performanca artistike nga soprano, mezzosoprano, tenor, bas, piano, kori dhe aktorë të njohur.
Programi i mbrëmjes përfshin:
Fjalë përshëndetëse nga të ftuar të nderuar
Ligjëratë historike nga Don Shan Zefi mbi 20-vjetorin e bekimit të gurthemelit të Katedrales
Dokumentar me pamje arkivore nga ky përvjetor
Koncert solemn me pjesëmarrjen e artistëve të njohur: Besiana Mehmedi (mezzosoprano), Mariana Leka (soprano), Gerald Murra (tenor), Bledar Domi (bas), Rudina Ciko (piano), kori “Të Mirët e Kombit”, si dhe aktorët Safete Rogova e Xhevat Limani.
Koncerti do të drejtohet nga dirigjenti Zhani Ciko, ndërsa drejtori artistik është Shkodran Tolaj.
Pas koncertit do të mbahet edhe koktej në qendrën “Bogdanipolis”.
