Në veri të Mitrovicës janë shpërndarë fletushka me mbishkrime nacionaliste serbe. Në to shkruhen slogane si “Rezistencë” dhe “Popull është koha”, ndërsa u bëhet thirrje qytetarëve serbë që të varin flamujt e Serbisë në banesa dhe shtëpi.
Zëvendësdrejtori i Policisë së Kosovës për rajonin e veriut, Veton Elshani, e ka konfirmuar ngjarjen për RTKlive, duke thënë se policia është njoftuar për këtë rast, por nuk ka bazë për inicim penal.
“Mbrëmë para mesnate, policia ka hasur në këto mbishkrime, është njoftuar prokurori dhe sipas tij nuk ka elemente për inicim të rastit,” ka deklaruar Elshani.
Në një nga fletushkat, bëhet thirrje e hapur për vendosjen e flamujve serbë në çdo vend të dukshëm.
“Flamuri ynë serb nuk është vetëm një copë pëlhurë. Ai është shenjë e lirisë, unitetit dhe krenarisë. Prandaj, vëllezër dhe motra, le të varë secili prej nesh flamurin në shtëpinë e vet, në dritare, në ballkon, në çdo vend ku shihet. Le të dinë se jemi këtu, se nuk do të zhdukem,” thuhet në fletushkë.
Ndërkohë, një ditë më parë, kryetari i komunës së Zveçanit, Ilir Peci, njoftoi se ka marrë vendim për largimin e fotografisë së Ratko Mlladiqit nga muret e qytetit, duke e cilësuar këtë hap si një mesazh të qartë kundër glorifikimit të krimeve të luftës.
“Ky është një hap konkret për të eliminuar çdo simbol të dhunës dhe urrejtjes nga hapësirat publike dhe për të garantuar se qyteti ynë mbetet një vend paqeje dhe harmoni për të gjithë banorët, pa dallime kombëtare apo etnike,” tha Peci, duke shtuar se “glorifikimi i krimeve të luftës dhe nxitja e urrejtjes nuk ka vend në qytetin tonë”, ka shkruar Peci.
