Kryetari i sapozgjedhur i Kuvendit të Kosovës, Dimal Basha, ka thënë se ky institucion dhe vet shteti është i ndërtuar mbi sakrifica shumëvjeçare.
“Ky institucion është zemra e demokracisë sonë, vendi ku përfaqësohen zërat e të gjithë qytetarëve. Republika jonë është e ndërtuar mbi sakrifica dhe mbi besimin e përbashkët se liria dhe shteti ynë janë më të mëdha se çdo interes i përveçëm. Republika jonë është e ndërtuar mbi sakrifica të panumërta, mbi gjakun, mundin dhe qëndresën e atyre që besuan se e ardhmja e kombit ishte më e rëndësishme se vet jeta e tyre”, ka thënë ai.
Ai gjatë fjalimit të tij ka nderuar historinë e grave dhe figura publike të cilat ndikuan në shtetndërtimin e Kosovës në etapa të ndryshme kohore. Vazhdoi me nderimin e kontributit të ushtarëve të UÇK-së, të cilën e sollën lirinë dhe figurës paqeruajtëse të Ibrahim Rugovës.
Basha ka thënë se Kosova mbetet një nga projekte më të suksesshme të bashkësisë ndërkombëtare dhe se intervenimi i tyre shpërblehet me një vend të zhvilluar, emancipuar e demokratik.
“Ka disa muaj që ky Kuvend është ballafaquar me një sfidë që s’e kemi parë më herët, por me të gjitha betejat unë besoj fuqishëm që ka qenë shkollë që i ka shërbyer demokracisë por edhe emancipimit tonë si shoqëri. Këto ballafaqime gjinden edhe në vendet më të zhvilluara dhe prandaj me rëndësi është që gjithçka është bërë në kuadër të konturave të debatit demokratik”, ka thënë Basha.
Basha, gjatë adresimit të tij si kryeparlamentar, ka bërë thirrje për Serbinë që të njeh shtetësinë e Kosovës dhe të ndërtojë marrëdhënie të mira fqinjësore.
“Nga ky Kuvend bëj thirrje për një Serbi të demokratizuar që njeh Kosovën si shtet të pavarur, një raport të fqinjësisë së mirë që ndërtojmë marrëdhënie të mira, ku mendojmë të ndërtojmë gjenerata që ndërtohen me respekt e tolerancë, e jo me urrejtje e konflikt. Ne jemi për ndërtimin e urave të bashkëpunimit, por edhe urave fizike që lidhin komunitetet tona në mënyrë që të kemi sa më shumë njohje e mirëkuptim dhe të mos lejojmë që gjeneratat tona që vijnë pas nesh, të rriten në injorancë të njëri-tjetrit”, ka thënë Basha.
Ai ka bërë thirrje për unifikim dhe bashkëpunim mes deputetëve në legjislaturën e nëntë.
