Gjatë viteve, fusha e shëndetësisë në Kosovë është përballur me raste të shumta të keqpërdorimit të buxhetit, duke vënë në pah nevojën urgjente për transparencë dhe llogaridhënie më të fortë në shpenzimet publike.
Kështu u tha në publikimin e analizës “Fondet publike, shëndeti publik”: Analiza e transparencës së buxhetit të shëndetësisë në Kosovë? nga Grupi për Studime Juridike dhe Politike
Pavarësisht se janë ndërmarrë disa hapa drejt përmirësimit të transparencës buxhetore në sektorin e shëndetësisë, në analizë thuhet se mbeten boshllëqe të mëdha në mënyrën se si planifikohen, shpenzohen dhe raportohen fondet publike nga Ministria e Shëndetësisë.
Kjo analizë vë në pah mungesën e kontrollit që ka lejuar keqpërdorime të mëdha gjatë viteve, ndërkohë që mbikëqyrja parlamentare është e dobët, me vetëm 53 pikë nga 100.
” Ne e dimë që për gjatë viteve një pjesë e madhe e buxhetit menaxhohet prej MSH dhe SHSKUK dhe 10% të ndarjeve buxhetore shkojnë për sektorin e shëndetësisë dhe kjo mos llogaridhënie mungesa e tranerancesë ka bërë që gjatë viteve të ketë keqpërdorime të mëdha të buxhetit..”, ka thënë Agron Demi, autor i analizës.
Sipas kësaj analize, Shërbimi Spitalor Klinik Universitar ka pasur progres në publikimin e raporteve financiare, por që raportet nuk i përmbushin standardet ndërkombëtare.
Megjithatë, lidhur me keqpërdorimin e mundshëm të fondeve, drejtori financiar i SHSKUK-së, Enver Gashi, tha se nuk mund të thotë se ka pasur apo s’ka pasur, pasi me këtë pjesë merren organet kompetente.
“Ne ofrojmë shërbime dytësore dhe tretësore për opinion që kanë nevojë, qytetarët t’i ftosh të gjithë shoqëria civile dhe media vijnë në takimin e bordit, aty diskutohet. Edhe dokumentet aty i kanë, kanë qasje në dokumente edhe të kërkesave edhe të propozimeve tona”, ka thënë Gashi.
Në këtë analizë është spikatur përfshirja në Fondin për Trajtim Jashtë Institucioneve Publike, përmes të të cilit thuhet se shteti shpenzoi gati 70 milionë euro midis viteve 2013 dhe 2020 për shërbime spitalore private, si brenda ashtu edhe jashtë vendit, ndërsa ende i detyrohej 30 milionë euro për trajtime. Sipas kësaj analize, pagesat për spitale specifike turke u rritën ndjeshëm gjatë kësaj kohe, nga 30,000 euro në vitin 2013 në më shumë se 2.5 milionë euro në vit, duke ngritur shqetësime në lidhje me referime të pajustifikuara, favorizime dhe mungesë mbikëqyrjeje.
