Instituti i Kosovës për Drejtësi vlerëson zgjedhjen e Dimal Basha si kryetar i Kuvendit si një hap të rëndësishëm për tejkalimin e bllokadës institucionale, por thekson se procesi i zgjedhjes së nënkryetarëve nga komunitetet jo-shumicë është zhvilluar në shkelje të Kushtetutës, Rregullores së Kuvendit, aktgjykimeve të Gjykatës Kushtetuese dhe praktikës parlamentare.
IKD ka monitoruar se gjatë seancës konstituive më 26 gusht, procedura e zgjedhjes së nënkryetarëve nga komunitetet jo-shumicë nuk është zbatuar në përputhje me rregullat e përcaktuara, duke cenuar përfaqësimin dhe integrimin kushtetues të komuniteteve jo-shumicë.
“Sipas Kushtetutës dhe Rregullores së Kuvendit, kandidaturat për nënkryetarë duhet të propozohen me shkrim nga shumica e deputetëve të komuniteteve përkatëse dhe të votohen së bashku, në pako”, thuhet në reagim.
Në rastin konkret, IKD thekson se kandidatura dhe zgjedhja e Emilija Rexhepit nuk kanë respektuar këtë procedurë, duke shkelur kërkesat e formës së propozimit dhe transparencës. Po ashtu, sipas kësaj organizate, votimi është ndarë në mënyrë të kundërligjshme, duke shkelur një praktikë të mëparshme të pranuar nga vetë subjektet politike.
IKD kërkon nga Kryetari i Kuvendit që në seancën e radhës, të përsëritet procesi i votimit për nënkryetarët nga komunitetet jo-shumicë, duke respektuar në mënyrë rigoroze Kushtetutën, Rregulloren dhe aktgjykimet e Gjykatës Kushtetuese.
Në reagim ndër të tjera thuhet se procedura duhet të jetë e bazuar në propozime me shkrim dhe votim të përbashkët në pako, për të garantuar përfaqësimin kushtetues dhe integrimin demokratik të komuniteteve.
