Tash e dy vjet në veri të vendit funksionon një nga 5 zyrat rajonale të Agjencisë Kosovare për Krahasim dhe Verifikim të Pronave. Në kuadër të projektit për bartje të pronësisë, shumë banorë tashmë e kanë zgjidhur problemin e pronësisë të mohuar për vite të tëra. Ky projekt përfshin të gjitha zonat kadastrale dhe bëhet falas.
Agjencia Kosovare për Krahasim dhe Verifikim të Pronës vazhdon me zbatimin e projektit i cili është në shërbim të qytetarëve në tërë vendin, lidhur me mundësinë e bartjes së pronës në emër të vetin, për personat që nuk kanë pasur mundësi ta bëjnë këtë nga viti 1945 deri në vitin 1999.
Projekti përfshin të gjitha zonat kadastrale dhe bëhet falas. Tash e dy vjet kjo zyrë është funksionale edhe në veri të vendit dhe ka zgjidhur mjaftë probleme pronësore, përfshirë prona të paluajtshme dhe prona bujqësore.
“Kemi liruar prona të uzurpuara që pyetët, dhe kurdo që qytetarët, pronarët legjitim paraqesin kërkesë për riposedim apo kthim të pronës në posedim të tyre, Agjencia është e gatshme të veprojë në raste të tilla. Falë ndryshimit pozitiv që ka ndodhur në këtë pjesë të vendit, falë rrethanave të reja na është lehtësuar puna edhe neve si Agjenci në këtë pjesë. Deri më tani, thashë, kemi liruar një numër të konsiderueshëm të pronave, saktësisht diku janë liruar diku rreth 56 apo 57 prona në pjesën veriore të vendit i është kthyer e drejta, është zbatuar ligji, do të thotë vendimi për ato banesa ose për ato prona”, ka thënë Erblin Macula, Zyrtar përgjegjës në KPCVA Mitrovicë.
Arianit Buqaj, Zyrtar përgjegjës në KPCVA, tha se të gjithë ata qytetarë të cilët para vitit 1999 kanë blerë një pronë dhe nuk kanë mundur ta formalizojnë transaksionin që e kanë bërë, të gjithë ata tash kanë të drejtë që përmes Agjencisë Kosovare për Krahasim dhe Verifikim të Pronës të parashtrojnë kërkesat e tyre dhe të bëjnë këtë njohje të së drejtës pronësore dhe ta formalizojnë atë.
Agjencia Kosovare për Krahasim dhe Verifikim të Pronës vazhdon t’u bëjë thirrje qytetarëve të vendit të cilët ende nuk e kanë të rregulluar apo të bartur pronën në emër të vetin dhe të cilët i plotësojnë kriteret e parapara sipas ligjit, të mos ngurrojnë të paraqiten dhe të iniciojnë kërkesën për rregullim të pronës. Kjo agjenci, pos përmes faqes zyrtare, ka edhe pesë zyra rajonale që pret qytetarët.
