Kryetari i Partisë Demokratike të Kosovës, Memli Krasniqi, ka thënë se kryeministri në detyrë, Albin Kurti, e ka pasur mënyrë të jetesës demonizimin e UÇK-së dhe të udhëheqësve të saj.
“Nëse është dikush që e ka pasur mënyrë jetese demonizimin e UÇK-së, ai është Albin Kurti. Rrjedhimisht, gati secili që i është bashkuar atij, ka përvetësuar të njëjtin mentalitet,” tha kryetari i PDK-së.
Sipas tij, kjo është reflektuar edhe në propozimet e Vetëvendosjes për kryetarë të Kuvendit.
“Shembulli i propozimeve nga Lëvizja Vetëvendosje për Kryetar të Kuvendit e tregon më së miri: Albulena Haxhiu, Donika Schwartz, Hekuran Murati – të tre me qëndrime dhe veprime kundër UÇK-së dhe trashëgimisë së saj. Njëra duke ua zvogëluar fondet e mbrojtjes në Gjykatën e Hagës, tjetra duke pranuar se ka dorëzuar dosje kundër krerëve të UÇK-së, e tjetri duke përjashtuar nga paga minimale kategoritë e luftës çlirimtare dhe duke i fyer luftëtarët e lirisë në krahasimet që ua bënte me mercenarë”,tha ai.
Kryetari i PDK-së ka kritikuar ashpër edhe Dimal Bashën, kryetarin e sapozgjedhur të Kuvendit, duke iu referuar një artikulli të mëhershëm të tij, që sipas PDK-së, përmban gjuhë fyese ndaj UÇK-së.
“Sa më shumë të distancohesh nga UÇK-ja, aq më shpejt ngjitesh në parti. Kjo edhe mund të jetë formula e tyre e brendshme,” deklaroi ai.
Sipas tij, vota e PDK-së për kandidaturën e Bashës nuk ka qenë për individin, por një përpjekje për të zgjidhur bllokadën institucionale dhe për ta ekspozuar Vetëvendosjen ndaj së vërtetës publike.
Në përmbyllje, ai theksoi se PDK do të vazhdojë të mbrojë trashëgiminë e UÇK-së dhe shtetin e Kosovës, pavarësisht zhurmës politike.
