Sindikata e Bashkuar e Arsimit, Shkencës dhe Kulturës (SBASHK) ka uruar punëtorët arsimorë për fillimin e vitit të ri shkollor, duke i përgëzuar për angazhimin e tyre edhe gjatë gushtit në përgatitjet për nisjen e mbarë të vitit.
SBASHK-u ka uruar gjithashtu nxënësit dhe prindërit, duke u dëshiruar sa më pak stres në lidhje me furnizimin me tekstet shkollore, duke kritikuar ministren Arbërie Nagavci dhe stafin e saj se për të tretin vit radhazi procesi është menaxhuar “në mënyrën më të gabuar të mundshme”.
Në komunikatë, sindikata rikujton anëtarësinë se është e gatshme për dialog, por edhe për veprime sindikale, duke veçuar disa nga kërkesat kryesore si: zbatimi i Kontratës Kolektive, realizimi i vendimit të Gjykatës Kushtetuese për pagesën e 0.5% të pagës për 15 vitet e para të punës, ngritja e koeficientit të pagave, përmirësimi i kushteve të punës dhe kërkesa të tjera që, sipas tyre, janë grumbulluar për shkak të “qëndrimit armiqësor të Qeverisë Kurti ndaj sindikatave”.
“Apelojmë që edhe përkundër pakënaqësive, anëtarësia të japë maksimumin në misionin e shenjtë të edukimit dhe arsimimit, por njëkohësisht lutemi që të krijohet një qeveri e re, e gatshme për dialog dhe respekt të ndërsjellë”, thuhet në njoftimin e SBASHK-ut.
Sindikata gjithashtu ka kërkuar nga institucionet komunale të mos ushtrojnë presion mbi mësimdhënësit për të nënshkruar kontrata të reja të punës, të cilat sipas SBASHK-ut janë shumë më të pafavorshme krahasuar me ato ekzistuese.
