Pas raportimeve në media lidhur me krijimin e Listës së Votuesve dhe caktimin e votuesve në Qendrat e Votimit për Zgjedhjet Lokale të 12 tetorit 2025, Komisioni Qendror i Zgjedhjeve përmes një komunikate për media e ka parë të nevojshme të sqarojë këtë situatë.
Në komunikatë thuhet se në informacionet e publikuara, disa qytetarë kanë shprehur shqetësime pasi kanë vërejtur se për zgjedhjet e ardhshme do të votojnë në një komunë tjetër, ndryshe nga komunat ku ata kanë votuar në proceset zgjedhore të kaluara. Në lidhje me këtë, KQZ sqaron se krijimi i ‘Listës së Votuesve’ për çdo komunë në Republikën e Kosovës është një proces i rregulluar me ligj dhe akte nënligjore të caktuara.
Po ashtu, KQZ vë në dukje se për disa vjet me radhë, në raportet vjetore të punës së KQZ-së është theksuar rëndësia e integrimit të sistemit unik të adresave në Regjistrin Qendror Civil. Ky sistem do të mundësojë caktimin e votuesve sa më afër vendbanimit të tyre, ashtu siç kërkohet nga Ligji Nr. 08/L-288 për Zgjedhjet e Përgjithshme”.
“Në përputhje me Ligjin Nr. 08/L-228 për Zgjedhjet e Përgjithshme, KQZ-ja është përgjegjëse për mbajtjen dhe përditësimin e Listës së Votuesve, duke u mbështetur në të dhënat e sakta dhe më të fundit të Regjistrit Qendror Civil. Gjatë këtij procesi, lista pastrohet sistematikisht nga personat që kanë ndërruar jetë ose që kanë hequr dorë nga shtetësia e Republikës së Kosovës”, thuhet në komunikatë.
Tutje bëhet e ditur se “ndryshimet që janë vërejtur lidhur me caktimin e votuesve në Qendrat e Votimit, janë të lidhura me aktivizimin e sistemit të adresave nga Agjencia për Regjistrimin Civil dhe Agjencia Kadastrale e Kosovës, i cili ka filluar në tetor të vitit 2024”.
Më tej në komunikatë sqarohet se ky proces ka pasur ndikim në caktimin e Qendrave të Votimit në disa komuna të Republikës së Kosovës, duke bërë që qytetarët të votojnë në Qendrat e Votimit më të afërta sipas adresës së tyre të banimit.
KQZ siguron qytetarët se ky proces është në përputhje të plotë me ligjin dhe synon të përmirësojë saktësinë dhe transparencën e procesit zgjedhor.
