Ambasada e Republikës së Shqipërisë në Republikën e Kosovës, njofton se në datën 3 shtator 2025 nga ora 10:00 – 12:00 dhe nga ora 14:00 – 16:00, hap në ambientet e saj librin e ngushëllimeve në nderim të personalitetit të shquar të kinematografisë shqiptare, regjisorit Dhimitër Anagnosti, i cili u nda nga jeta një ditë më parë.
Dhimitër Anagnosti ishte një prej regjisorëve më të njohur dhe më me ndikim në historinë e kinemasë shqiptare. Ai ka realizuar një sërë filmash artistikë që kanë lënë gjurmë në kulturën dhe identitetin kombëtar, duke u vlerësuar me çmime të shumta kombëtare dhe ndërkombëtare.
Përveç veprimtarisë së tij artistike, Anagnosti ka qenë edhe deputet dhe ministër i Kulturës në Shqipëri në fillim të viteve ’90, duke dhënë kontribut të çmuar në jetën publike e kulturore të vendit.
Figura e tij mbetet një simbol i artit dhe kulturës shqiptare, ndërsa ndarja e tij nga jeta përbën një humbje të madhe për kinematografinë dhe shoqërinë shqiptare.
