Gazetari Naser Selmani ka bërë të ditur se sot në mëngjes ka zbuluar se një person i panjohur ka dëmtuar me thikë gomën e makinës së tij, e cila ishte e parkuar para ndërtesës ku ai banon në Shkup.“Nuk i kam borxh askujt dhe nuk kam konflikt me askënd. Rastin e paraqita në polici dhe njoftova personalisht ministrin e Brendshëm, Pançe Toshkovski, nga i cili kërkova zbardhjen e autorëve dhe inspiratorëve të këtij akti kriminal”, shkroi Selmani.
Ai tha se ministri i ka premtuar se policia do të punojë për zbardhjen e rastit. Selmani theksoi se është gazetar, qytetar i zakonshëm dhe anëtar i Lëvizjes “Bota Shqiptare”, duke nënvizuar se nuk është pjesë e asnjë partie politike.
Gazetari u bëri thirrje kryeministrit Hristijan Mickoski dhe liderëve të partive shqiptare që të dënojnë sulmin, të cilin e cilësoi si një akt të shëmtuar kundër lirisë së fjalës.
“Nëse mendoni se me metoda kriminale mund të më frikësoni, e keni gabim. Keni zgjedhur njeriun e gabuar,” shkroi ai, duke paralajmëruar se, nëse brenda dy javësh organet hetimore nuk zbulojnë autorët, ai do të publikojë dyshimet e tij mbi ata që qëndrojnë pas sulmit.
Selmani shtoi gjithashtu se, nëse institucionet nuk mbrojnë qytetarët, ai do të kërkojë mbrojtje nga organizatat ndërkombëtare, si dhe nga Shqipëria dhe Kosova, për gazetarët dhe shqiptarët e rrezikuar në Shkup.
