Shqiptarët janë populli më entuziast në rajon sa i përket anëtarësimit në Bashkimin Evropian. Megjithatë, ndryshe nga ky vullnet i lartë, mbështetja nga qytetarët e vendeve anëtare të BE-së për pranimin e Shqipërisë dhe Kosovës mbetet më e ulët.
Sipas Eurobarometrit të vitit 2025, 92% e shqiptarëve shprehen pro hyrjes në Bashkimin Evropian, ndërsa 82% e tyre kanë një përshtypje pozitive për Unionin. Pas Shqipërisë, mbështetjen më të madhe për integrimin evropian e tregojnë qytetarët e Maqedonisë së Veriut dhe Gjeorgjisë.
Në anën tjetër, më skeptikët janë serbët: vetëm 33% e tyre duan që vendi i tyre të bëhet pjesë e BE-së.
Megjithatë, Shqipëria dhe Kosova renditen ndër vendet më pak të preferuara nga qytetarët e vendeve anëtare të BE-së për t’u bërë pjesë e Unionit. Vetëm 45% e europianëve janë pro anëtarësimit të Shqipërisë në BE, ndërsa Kosova mbështetet nga 43% e tyre. Më shumë mbështetje gëzojnë Ukraina (52%) dhe Mali i Zi (51%).
Mbështetja për zgjerimin është më e lartë tek të rinjtë dhe në vendet nordike si Suedia, Danimarka dhe Lituania, ndërsa në shumë shtete të tjera anëtare, qëndrimet mbeten të përziera.
Komisionerja për Zgjerimin, Marta Kos, theksoi se mbështetja e fortë në Shqipëri është një sinjal inkurajues dhe pasqyrë e angazhimit të qytetarëve për një të ardhme evropiane.
Ndërsa procesi i negociatave po ecën përpara, Eurobarometri i fundit e vërteton edhe një herë: Shqiptarët e duan BE-në – por mbeten në pritje të vullnetit të vendeve anëtare.
