Sekretari i Shtetit i SHBA-së, Marco Rubio, ka thënë se Shtetet e Bashkuara do të “hedhin në erë” grupet kriminale të huaja nëse është e nevojshme. Ai nuk e përjashtoi bashkëpunimin me vendet e tjera në këtë përpjekje.
Ata do të na ndihmojnë t’i gjejmë këta njerëz dhe t’i hedhim në erë, nëse është e nevojshme”, tha Rubio gjatë një vizite në Ekuador, raporton BBC.
Ai njoftoi gjithashtu se SHBA-të do t’i shpallnin dy bandat më të mëdha kriminale në Ekuador – Los Lobos dhe Los Choneros – si organizata terroriste të huaja.
Komentet vijnë disa ditë pasi forcat amerikane kryen një sulm ndaj një anijeje në Detin e Karaibeve.
Shtëpia e Bardhë pretendon se 11 trafikantë droge u vranë, megjithëse nuk ka zbuluar identitetin e tyre.
“Presidenti tha se dëshiron të shkojë në luftë kundër këtyre grupeve sepse ata kanë qenë në luftë kundër nesh për 30 vjet. Por në shumë raste nuk ka nevojë ta bëjmë këtë me qeveri miqësore, sepse qeveritë miqësore do të na ndihmojnë”, deklaroi ai.
Qeveritë ekuadoriane dhe meksikane nuk kanë thënë se do të ndihmojnë në sulmet ushtarake.
Ekspertët ligjorë i thanë BBC Verify se sulmi mund të ketë shkelur të drejtat ndërkombëtare të njeriut dhe ligjin detar.
Rubio njoftoi gjithashtu se Uashingtoni do të miratojë 13.5 milionë dollarë ndihmë për sigurinë dhe 6 milionë dollarë në teknologji dronësh për të ndihmuar Ekuadorin në luftën kundër trafikut të drogës.
