Volodymyr Zelensky tha se Presidenti rus Vladimir Putin mund të vijë në Kiev për bisedime, duke theksuar se ai vetë nuk ka ndërmend të shkojë në Moskë.
“Ai mund të vijë në Kiev. Unë nuk mund të shkoj në Moskë kur vendi im është nën raketa, nën sulm çdo ditë”, tha presidenti ukrainas në një intervistë me ABC News.
Zelensky shtoi se propozimi i Putinit për t’u takuar në Moskë synon vonimin e procesit të negociatave. Sipas Zelensky, presidenti rus po “luan lojëra me Shtetet e Bashkuara” dhe e kupton pamundësinë e një takimi në Moskë.
Putini ka deklaruar dy herë këtë javë gatishmërinë e tij për t’u takuar me Zelenskyn në Moskë. “Nëse dikush dëshiron vërtet të takohet me ne, ne jemi gati. Vendi më i mirë për këtë është kryeqyteti i Federatës Ruse, qyteti hero i Moskës”, tha presidenti rus në Forumin Ekonomik Lindor më 5 shtator.
Në të njëjtën kohë, Putin vuri në dukje se nuk sheh shumë kuptim në një takim të tillë, por është gati të presë Zelenskyn dhe t’i ofrojë atij garanci sigurie.
Kremlini nuk komentoi mbi propozimin e Zelensky-t për një takim të mundshëm me Putinin në Kiev.
